ROXAS CITY – Wala sang mahimo ang mga manugpanginhas sa Barangay Barra, sini nga syudad, kundi magsunod sa mandu sang lokal nga gobyerno sang syudad kag probinsya nga indi magbaligya sang panginhason sa merkado.
Sa interview sang Bombo Radyo sa pila ka mga manugpanginhas sa lugar, ginpahayag ni Andy Lorenzo, 57-anyos, nga apisar bawal ang pagkaon sang panginhason, wala ini sang mahimo bangud gutom ang ila madangatan kag ini nalang ang nagaserbe sabat agud makakaon man sila sa isa ka adlaw.
Ginpahayag sini nga wala man naglain ang ila pamatyag sa pagkaon sang panginhason, nga makuha sa kalalawran nga sakop sang ila barangay.
Suno naman kay Nanay Emma Ortega, 70-anyos, nga nagapangayo nalang ini sang sud-an ukon utan agud makakaon lang, kag kun kaisa apisar peligroso, wala ini sang choice kundi magkaon sang sisi, bangud ginabawalan na ini nga magbaligya kag wala naman sang nagabakal.
Panawagan sang mga ini sa gobyerno nga kuntani mahatagan man sila sang bulig nga makapiyan-piyan sa ila pang-adlaw-adlaw nga pagkaon bangud ang pagpanginhas lang ang ila palangabuhianan, apang ginpagbawal bangud sa pagkapositibo sa red tide sang ila kalalawran.
Sa pihak nga bahin, ginpahayag ni Punong Barangay Ernie Borreros, nga nagpadala na ini sang sulat sa City government sang Setyembre 27, para sa hinyo nga bulig sang 450 ka mga rehistrado nga manugpanginhas, nga apektado sang amu nga phenomenon, kag nagalaom nga mahatagan man sila sang igtalupangod sang syudad.
