ROXAS CITY-Ginahangkat ni Pilar Mayor Arnold Perez ang mga wala matumod nga mga tag-iya sang mga fake accounts sa Facebook nga nagapalapta sang sala nga mga impormasyon batuk sa iya administrasyon nga magpaguwa sang ebidensya agud mapamatud-an ang ila mga alegasyon.
Dako ang pagpati ni Perez nga fake account ang nagpost sa Facebook kag ang katuyuan lamang sini amo ang maguba siya kag ang iya nga administrasyon.
Aminado si Perez nga nagpa-order ang utod sini sang bangrus sa mga empleyado sang munisipyo apang gintul-id sang alkalde nga makaisa lamang ka beses ini natabo kag ginpanginwala ang alegasyon nga gina negosyohan sang pamilya Perez ang mga empleyado sang munisipyo.
Ginpanginwala man sang alkalde ang alegasyon nga ang pamilya Perez ang ginakuha nga catering service sa tion nga may yara sang aktibidad ang ila nga banwa.
Samtang handa naman nga sabton sang alkalde ang anuman nga alegasyon nga ginahaboy batuk sa iya.
Nagapati si Perez nga isa lamang ini ka pagpanamad sa iya administrasyon kag sa iya pamilya.
