PILAR, CAPIZ – Ginklaro sang alkalde sang banwa sang Pilar nga isa gid lamang ka grupo ang nagapatigayon sang pagpanakop sang mga ilegalista sa kalalawran nga sakop sang banwa nga miyembro sang Bantay-Dagat Task Force.
Ini ang ginpahayag ni Mayor Arnold Perez sang mainterview sang Bombo Radyo.
Suno kay Perez nga ang nasambit nga hubon ang ginapangunahan ni Ernesto Cuñada.
Matandaan nga sadtong Nobyembre 18, nagpa-blotter sa Pilar Municipal Police Station si Renato Ligason, empleyado sang Office of the Municipal Agriculturist kag deputized member sang Bantay-Dagat agud i-reklamo sanday Rolando Bayaban Jr., Christian Guzman kag Warren Bonita nga ginaalegar nagapangdakop sang mga nagapatigayon sang ilegal nga pagpangisda apisar indi sila otorisado nga miyembro sang hubon.
Sandig sa reklamo ni Ligason, apisar ginpaandaman na sini ang grupo nanday Bayaban, wala gihapon sila nagauntat sa pagpangkompiskar sang mga fishing equipments sa ila mga madakpan.
Naka-attached man sa ginpabalhag nga reklamo ni Ligason ang kopya sang isa ka executive order sang banwa kun sa diin nasaad ang pagtukod sang Bantay-Dagat Task Force sang banwa kag ang pangalan sang mga deputized members sang hubon.
Apang ginkompirmar ni Perez nga si Bayaban, nga barangay kagawad sang Barangay Binaobaoan sang nasambit nga banwa, ang volunteer gidman sang hubon kag wala ini sang may ginabaton nga sweldo.
Sa karon plano sang alkalde nga magpakigsapol sa magtimbang nga bahin kag estoryahon ang mga ini kun ano ang matuod nga natabo kag kun ano ka matuod nga may pahanugot ni Ligason ang ginhimo nga operasyon sang grupo ni Bayaban.
Gindugang pa ni Perez nga siya mismo ang nagpili sa mga mangin miyembro sang hubon kasunod sang iya pagpungko bilang alkalde sang banwa.
