PILAR, CAPIZ – Nagpahayag sang mga anti-robbery tips ang Pilar Municipal Police Station agud makalikaw sa pagpangawat kag mapalig-on ang seguridad sang mga establishemento kag pumuluyo sa banwa sang Pilar, Capiz.
Sa interview sang Bombo Radyo kay Police Captain Achilles P Fangco Jr., Officer-in-Charge sang Pilar Municipal Police Station, iya ginpahanumdom ang mga tag-iya sang negosyo kag komunidad nga magpatuman sang mga nagakaigo nga tikang batok sa pagpangawat.
Lakip sa mga ginarekomendar nga amo ang pagsiguro nga may nagakaigo nga suga ang entrance kag exit agud mas mahapos makita ang mga tawo nga nagasulod kag nagaguwa.
Samtang ang pagpahamtang sang Closed-Crcuit Television “CCTV” kag barriers makabulig man sa paglikaw sang pagsulod sang mga indi awtorisado kun sa diin limitado ang pag-access.
Pahayag pa niya ang pag-instalar sang hold-up alarm system makabulig man sa pagpangayo gilayon sang bulig kon may emerhensya, kag ang pagsiguro nga pirmi naka-lock ang mga safe nga may yara sang malahalon nga pagkabutang.
Sa karon, hugot nga ginapahanumdom sang kapulisan ang publiko nga mangin mabinantayon kag likawan ang pagbato sa mga kawatan ilabi na kun armado ukon may dala ini nga matalom nga bagay, agud malikawan ang wala ginalauman nga peligro.
