Bukas ang Pilipinas sa pagpanubo sang Alert Level 3 nga ginapasaka subong sa Israel kag Iran.
Sa interview sang Bombo Radyo kay Foreign Affairs undersecretary Eduardo de Vega, iya ginpahayag nga handa ang pungsod nga panubuan ang alerto sa duha ka nasambit nga pungsod sa labing madali nga panahon kun magdugay ang gindeklarar nga ceasfire.
Apang kinahanglan suno sa iya ang opisyal ukon pormal nga rekomendasyon gikan sa Philippine Ambassador nga na-assign sa duha ka pungsod agud lubos nga makonsiderar ang pagpanubo sang alerto.
Sa idalum sang third alert, ipatuman sang gobyerno sang Pilipinas ang voluntary repatriation para sa mga Pilipino sa mga pungsod sa diin ginpalab-ot ang alerto.
Sa subong, ginpasalig ni De Vega nga magapadayon ang Alert Level 3 protocol nga ginasunod sang Pilipinas sa duha ka nasambit nga pungsod.
Kalakip diri ang pagpapauli sa mga luyag magpauli sa pungsod, kag pagpreparar sang nagakaigo nga bulig para sa tagsa ka magapauli nga Pilipino.
Nauna man nga ginpahayag ni Philippine Ambassador to Israel Aileen Mendiola nga gikan sa 340 ka mga Pinoy nga una nga naghingyo nga magpauli sa Pilipinas sa tion sang putukputukan sang ginatawag nga 12-day war, lubos nga nagnubo ang numero kasunod sang lubos nga pagkanselar sang mga Pinoy sa ila request, bangud sa gin-aprubahan nga ceasefire.
