Nagpatigayon ang mga naval kag air unit’s sang Pilipinas, Canada, kag Estados Unidos para sa ika-7 Multilateral Maritime Cooperative Activity (MMCA) sa sulod sang exclusive economic zone (EEZ) sang Pilipinas.
Ginalauman nga ang ginhimo nga exercise magapasangkad sa kooperasyon kag interoperability sang mga kaupod nga pwersa, kag magapabaskog sa kalig-on sang rehiyon subong man magasustento sa mga prinsipyo sang isa ka mahilway nga Indo-Pacific.
Suno kay Armed Forces of the Philippines (AFP) chief Gen. Romeo Brawner Jr., ang exercise nagapakita sang maayo nga tinutuyo sang mga pungsod nga nakigbahin agud mapabaskog pa ang
kooperasyon kadungan sa international law.
Ginsambit man ni Brawner nga ang MMCA, nagaduso sang isa ka tinutuyo nga halungan ang kinamatarong sa pagpalawod, kahanginan, kag maritime rights, suno sa mga pagsulundan sang United Nations Convention on the Law of the Sea (UNCLOS).
Ang ika-7 nga MMCA ang kadungan sang mga natapos nga exercise sa rehiyon, kung sa diin nagsugod ang ika-1 MMCA sadtong Abril 2024, kag ginsundan sadtong bulan sang Hunyo, Agosto, Setyembre, kag Disyembre sa kaparehas nga tuig.
Samtang, ang Ika-6 MMCA naman ang ginpatigayon sadtong Pebrero 5 subong nga tuig kag ang subong nga exercise naman ginpatigayon sa West Philippine Sea (WPS), partikular sa sulod sang joint operational area sang Northern Luzon Command (NOLCOM).
Samtang, ginkumpirmar naman ni AFP public affairs office chief Col. Xerxes Trinidad, ang padayon nga ginahimo nga mga exercise apang nagpamalibad siya nga maghatag sang detalye angut sa mga partikular nga unit kag iban pa nga mga partisipante para sa mga rason nga pang-seguridad.
