ROXAS CITY – Nabalaka sa karon ang mga Pinoy sa Rome, Italy bangud sa hinali nga pagtaas sang numero sang mga napatay sa coronavirus disease (COVID-19) sa sulod lamang sang isa ka adlaw.
Sa report ni Bombo International Correspondent Joel Layno sang Barangay Tiza, Roxas City, 13 ka tuig na nga nagatrabaho sa Roma, Italy, ginpahayag sini nga kahadluk kag nabalaka sila nga mga Pinoy, bangud sa pihak sang ginapatuman nga lockdown sa bug-os nga Italya, may pila ka mga italyano nga nagalagaw pa kag wala nagagamit sang face mask bilang precautionary measures.
Indi man kumbinsido si Layno sa lockdown nga ginapatuman sa Italya, bangud mahimo pa nga makaguwa para makabakal sang pagkaon kag padayon man ang transportasyon.
Ginganyat man sini ang mga Pilipino nga magsunod sa ginapatuman nga preventive measures sang gobyerno para malikawan ang paglapta sang COVID-19.
Nahibaluan nga kadam-an sa mga nagkalamatay sa COVID-19 ang mga tigulang nga naga-edad sang 80 pataas.
Samtang siyam nga mga doktor kalakip ang ila medical team ang nalatnan na sang nasambit nga virus, sa diin nagahinyo na sila sang suporta sa kaingud nila nga mga probinsiya.
