Gin-akusaran sang Pilipinas ang pila ka mga Chinese fishermen nga nagagamit sang cyanide sa kadagatan sang Spratly Islands, partikular sa Ayungin Shoal nga madugay na nga ginabaisan.
Suno sa National Security Council (NSC), ang amo nga tikang ginaalegar nga nagsugod sang nagligad nga tuig sa palibot sang Second Thomas Shoal, isa ka lugar nga importante sa mga alagyan sang barko kag manggaranon sa dunang manggad.
Ginpahayag man ni NSC Assistant Director General Cornelio Valencia nga ang paggamit sang cyanide ang isa ka sahi sang “sabotahe” nga tuyo nga gub-on ang mga isda sa lugar, nga nagaserbe nga pagkaon sang mga Pilipino nga soldado nga naka-deploy sa BRP Sierra Madre.
Dugang pa niya, posible man nga mabutang sa katalagman ang ikaayong lawas sang mga suldado bangud sa kontaminado nga tubig kag pagkaon, kag mahimo man nga mahalitan ang mga coral reefs nga nagasuporta sa amo nga mga barko.
Suno naman sa Philippine Navy, nakumpiskar nila ang indi magnubo sa 10 ka botelya sang cyanide gikan sa mga sakayan nga may kaangtanan sa Chinese fishing vessels sang 2025.
May ginreport man nga bag-o lang nga insidente sa diin gin-alegar nga gingamit ang cyanide sa lugar.
Wala naman sang may nareport nga Filipino nga sundalo nga naapektuhan sang hilo.
Ginpahayag man sang mga opisyal nga ang mga mother ship sang mga mangingisda nga nadalahig ang ginaalegar konektado sa Chinese Navy.
Plano sang gobyerno nga magsumiter sang report sa Department of Foreign Affairs nga mahimo mangin basehan sang diplomatic protest batok sa China.
Hugot man nga ginpanginwala sang China ang akusasyon kag gintawag ini nga “stunt”, nga nagasiling nga ang ila mga bangka normal lang ang pagpangisda kag gina-harass sila sang mga Pinoy didto.
Samtang, ginpabaskog naman sang Philippine Navy kag Coast Guard ang ila pagbantay sa lugar agud malikawan ang dugang nga halit sa palibot kag mamentinar ang seguridad sa nasambit nga teritoryo.
