Ginalauman nga ang bugas nga gina-import sang Pilipinas magalab-ot sa 5.7 million metric tons subong nga tuig 2026 bangud sa ginalauman nga pagnubo sang lokal nga produksyon.
Suno sa United States Department of Agriculture (USDA), ginpataas ang forecast sa pag-import sang bugas halin sa 5.6 million MT pakadto sa 5.7 million MT bangud sang pagtaas sang gasto sa produksyon, manubo nga pagtanom sang mga mangunguma, kag pagnubo sang lebel sang tubig sa dalagku nga mga dam.
Dugang pa sang ahensya, ginalauman nga magalab-ot lamang sa 12.3 million MT ang produksyon sang milled rice sini nga tuig, mas manubo kon ipaanggid sa nauna nga pagbulubanta nga 12.4 million MT.
Nagpaandam man ang USDA nga mahimo nga maapektuhan pa gid ang produksyon sang humay bangud sa manubo nga lebel sang tubig sa mga dam kag posible nga pag-abot sang kasarangan tubtob mabaskog nga El Niño sa ulihi nga bahin sang tuig tubtub temprano nga bahin sang 2027.
