Gin-aprubahan na ni President Ferdinand Marcos Jr. ang rekomendasyon sa pagdeklara sang state of national calamity bangud sa halit nga gintuga sang bagyo Tino.
Ini ang ginpahayag ni Marcos matapos ang situation briefing nga ginpatigayon kaupod ang mga ahensya sang gobyerno.
Suno kay President Marcos, bangud sa kalaparon sang mga lugar nga nahalitan sang bagyo Tino kag mahalitan pa sang bagyo Uwan, ginpakamaayo niya nga aprubahan ang rekomendasyon sang National Disaster Risk Reduction and Management Council (NDRRMC).
Pahayag niya, ginalantaw nga 10 tubtob 12 ka mga rehiyon ang posible pa gid nga mangin apektado sang nagapasulod nga bagyo sa pungsod sa diin nagakinahanglan sang mas madasig nga access sa emergency funds.
Sa subong, nagapadayon ang relief operations para sa mga naapektohan sang bagyo Tino.
Samtang nagahanda naman ang gobyerno sa masunod nga weather disturbance nga ginalantaw magasulod sa Pilipinas sa weekend.
Ginadetermina na sang gobyerno ang numero sang mga personnel nga i-deploy para sa Tropical Storm Fung-Wong ukon may local name nga Uwan sa tion nga magsulod ini sa Philippine Area of Responsibility.
