Ginselyuhan sang Pilipinas kag Cambodia ang isa ka cooperation agreement nga naghatag sang giya sa dugang nga investment sa agrikultura sang Cambodia, partikular sa rice production kag trade.
Ang Memorandum of Understanding (MOU) sa Agricultural and Agribusiness Cooperation ginpirmahan sa official visit ni Cambodian Prime Minister Samdech Moha Borvor Thipadei Hun Manet sa pungsod.
Mahibaluan nga ginpormalisa nanday Agriculture Secretary Francisco P. Tiu Laurel Jr. kag Cambodia’s Minister for Agriculture, Forestry, and Fisheries Dith Tina ang MOU sa presensiya nanday Presidente Ferdinand R. Marcos Jr. kag Prime Minister Hun Manet sa Malacañang Palace.
Sa nauna nga bilateral meeting, gin-imbentahan ni Minister Dith Tina ang Pilipinas nga mag-invest sa nagalapad nga rice production sector sang Cambodia, kung sa diin may oportunidad nga magtukod sang rice milling facilities.
Ginhatagan man sang pagtamod ni Tiu Laurel ang papel sang Food Terminal Inc. sang Department of Agriculture sa nasambit nga investments.
Nagkasugot man ang duha ka pungsod nga mag-explore sang potential rice trade cooperation nga nakabase sa layi.
Magluwas diri, gintalakay man ang pag-explore sang importasyon sa mga utanon kag karne.
Ang importasyon sa tunga sang Pilipinas kag Cambodia sadtong 2023 naglab-ot sa USD80.50 million, kung sa diin ang agricultural products yara sa USD20.40 million.
Sa datos sang Philippine Statistics Authority nagaguha nga ang Pilipinas may trade deficit sa Cambodia.
Kaungdan man sa MOU ang ginpasanyog nga pagbuliganay sa agricultural planning, animal feed development, animal health protection, irrigation management, kag agricultural marketing systems.
Maga-explore man ang mga ini sa pagbayluhanay sang non-Geographical Indication-protected plant commodities agud iduso ang agricultural diversity kag innovation.
Ang ginpabaskog nga partnership, may tinutuyo nga iduso ang napabilin nga pagdabong sang agrikultura, pabaskugon ang importasyon kag pag-improba sang food security sa parehas nga pungsod.
