Nagpatigayon sang paghinun-anun sanday Department of Agrarian Reform (DAR) Sec. Conrado Estrella III kag Israeli Ambassador Ilan Fluss agud hinalaan ang pagpabaskog sa relasyon sang Pilipinas kag Israel.
Ang paghinala sang duha ka opisyal nakatutok sa pagbinuligay sa inobasyon pag-abot sa agrikultura, pagpasanyog sang mga lugar kag mga moderno nga teknolohiya sa pagpanguma.
Hugot naman nga ginbaton ni Estrella si Ambassador Fluss kag ginhatagan sang pagtamod ang kadalag-an sang programa sa reporma nga agraryo sang Pilipinas sa idalum sang pagdumala ni Pangulong Ferdinand R. Marcos Jr., nga naghatag sang dako nga benepisyo sa agrarian reform beneficiaries.
Ginpakigbahin naman ni Ambassador Fluss ang mga pagtilaw nga ginapangatubang sa karun sang Israel bangud sa kinagamo sa ila pungsod kag ginpakigbahin man sini ang kabakod sang ila sektor sang agrikultura, subong man ang importansya sang mga pangkalibutanon nga pagpakig-angut nagikan sa mga kaalyado kaangay sang Estados Unidos sa paghatag sang pagkaon kag bulig medikal para sa mga nasakupan.
Nahinalaan man ang mga nagapanguna nga posible kolaborasyon, partikular sa paggamit sang teknolohiya sang Israel pinaagi sang irigasyon nga mas maayo sa mga mamala nga lugar, kung sa diin isa sa mga importante nga kinahanglanon sang kadam-an nga mga mangunguma nga Pilipino.
Lunsay nagpahayag ang duha ka opisyal sang ila interes sa Precision Agriculture (PA), kung sa diin kilala ang Israel.
Samtang, ginkilala naman ni Estrella ang potensiyal sang PA nga bag-uhon ang mga pamaagi sang pagpanguma sa Pilipinas pinaagi sa paggamit sang datos sang teknolohiya agud mapaayo ang ani, paggamit sang tubig, kag pagdumala sa mga dunang manggad.
Ginsambit man ni Ambassador Fluss ang preparasyon sang Israel nga ipakigbahin ang ila ihibalo pag-abot sa kasubong sini nga patag.
Bilang kabahin sang pagbayluhanay sang ihibalo, gin-imbitahan ni Ambassador Fluss ang mga opisyal sang DAR nga magbisita sa Israel agud magpaidalum sa training sang mga eksperto sa pagpanguma, pagpasanyog sang lugar, kag pagbag-o sag klima.
Bangud sini, nagpahayag naman sang pagpasalamat si Estrella kag ginsiling ang pagpalawig sang programa agud makaupod ang mga nagtapos sa agrikultura nga ginbuligan sang DAR.
Ang Israel Economic Mission to the Philippines, sa pagpakig-angut sa Embahada sang Israel sa Maynila, may importante nga papel sa pagpalapnag sang importasyon kag kooperasyon nga pang-ekonomiya sa tunga sang duha ka pungsod.
