Pabaskugon sang Pilipinas kag Japan ang ila kooperasyon sa depensa kag seguridad sa Southeast Asia agud mas maayo nga masabat ang mga kalamidad, tensyon sa kadagatan, kag mga pagbag-o sa seguridad sa Indo-Pacific Region.
Ini ang ginhatagan pagtamod nanday Philippine Defence Secretary Gilberto C. Teodoro Jr. kag Japanese Defense Minister Koizumi Shinjiro sa ila opening statement sa ASEAN Plus One Defense Ministers’ Informal Meeting with Japan, nga ginhiwat sa Pilipinas.
Suno kay Teodoro, importante ang papel sang Japan bilang madugay na nga kaupod sang ASEAN sa pagsabat sang mga pagpanghangkat sa seguridad sa rehiyon, lakip na ang mga isyu sa East China Sea kag iban pa nga bahin sang kadagatan.
Nagpabutyag man sang pagpasalamat ang tiglikom sa padayon nga suporta sang Japan para sa sentralidad sang ASEAN kag sa mga programa nga nagatuyo sa pagpabaskog sang ikasarang sang mga katapo nga pungsod sa depensa kag seguridad kadagatan.
Gintalakay man ang pagbinuligay sang Pilipinas kag Japan bilang co-chairs sang ASEAN Defense Ministers’ Meeting-Plus Working Group on Maritime Security for 2024 tubtob 2027.
Ginpasalig sang duha ka pungsod nga ang ila tingub nga pagtinguha kag ang Future Leaders Program magapadayon sa pagpabaskog sang disaster preparedness, maritime security, kag relasyon sang mga pumuluyo sa rehiyon.
