Ginpabaskog sang Pilipinas kag sang Republic of Korea ang strategic partnership pinaagi sa pagpirma sang 10 ka mga kasugtanan agud labi pa nga mapabakod ang relasyon sa nagkalain-lain nga nagapanguna nga sektor kadungan sang State Visit ni President Lee Jae Myung sa Malacañang.
Suno kay President Ferdinand Marcos Jr., ang Memoranda of Understanding (MOU) nagasakop nahanungod sa depensa, veterans relations, agrikultura, trade, investment, intellectual property, digital cooperation, innovation, pagtudlo sang Korean language sa mga eskwelahan, kultura, kag kooperasyon sang kapulisan.
Suno sa iya, magabulig sila agud mapabilin ang momentum sang Philippines-Republic of Korea Strategic Partnership sa masunod nga mga tinuig.
Lakip sa mga ginpirmahan nga kasugtanan amo ang pagpabaskog sang digital kag technology cooperation, pagbakal sang defense materials, pagbinuligay sa agrikultura kag negosyo, pagpasangkad sang cultural exchanges, kag mas ginpabakod nga relasyon sa tunga sang Philippine National Police kag Korean National Police Agency.
