MANILA — Pito ka tuig pa ang kinahanglan agud maabot sang Pilipinas ang ideal nga ratio sang healthcare workers kumpara sa populasyon, suno sa Department of Health ukon DOH.
Ginpahayag ini ni DOH Secretary Edwin Mercado sa pagtalakay sang proposed 2027 budget sang ahensya sa Senate Committee on Finance.
Suno kay Mercado, kinahanglan sang pungsod sang 14.3 ka doktor, 27.4 ka nurses kag 2.8 ka midwives sa kada 10,000 ka populasyon agud maabot ang ginasiling nga ideal ratio sang healthcare professionals.
Sa tion nga wala pa maabot ini nga target, ginakabig sang DOH nga short-term solution ang task shifting, ukon paghatag sang pila ka buluhaton sa iban nga kwalipikado nga health workers, samtang sa malawig nga termino, kinahanglan mapunggan ang paghalin ukon attrition sang mga healthcare professionals kag hatagan sila sang mas klaro nga career development.
Apang bisan may kakulangan sa health workers, ginpahayag ni Mercado nga wala na sang banwa sa bilog nga pungsod nga wala sang doktor, lakip na ang mga geographically isolated and disadvantaged areas ukon GIDA.
Para sa 2027, gin-allocate sa proposed DOH budget ang pag-deploy sang 24,381 ka health professionals, lakip ang nurses kag medical technologists, agud mapabaskog ang serbisyo panglawas sa nagkalain-lain nga lugar.
Samtang, ginpahayag ni Senator Joel Villanueva nga may yara pa sang 9,069 ka bakante nga posisyon sa DOH, ukon 9.1% sang kabug-usan nga authorized positions sang ahensya.
Ginkilala man sang DOH nga isa sa mga problema amo ang kakulang sang mga aplikante para sa espesyal nga mga health profession, lakip ang speech therapists kag development specialists. Agud mapasanyog ang recruitment, nagpatukod ang ahensya sang mga selection kag promotion boards sa mga ospital.
Suno sa DOH, yara sa 92% ang fill-up rate sang ila mga posisyon, apang padayon gihapon ang paghangkat nga mapabilin sa serbisyo ang mga healthcare workers kag mapun-an ang mga bakante nga posisyon sa nagkalain-lain nga health facilities.
