Liwat nga nagpanguna ang Pilipinas sa World Risk Index bilang pungsod nga pinaka-exposed sa grabe nga epekto sang sobra nga panahon, partikular ang pagbaha, suno sa report nga ginpaguwa sini nga tuig.
Suno sa World Risk Report 2025 nga ginpaguwa sang Biyernes, ang Pilipinas ang isa sa mga pungsod nga may pinakamataas nga lebel sang disaster risk.
Ginbinagbinag sang report ang risgo sang kalamidad sa 193 ka pungsod sa bug-os nga kalibutan, nga nagalakip sang tanan nga katapo sang United Nation kag kapin sa 99 percent sang populasyon sang kalibutan.
Kadungan sang kasubong nga ranggo, nagtuhaw man ang mga isyu nahanungod sa mga iregularidad sa pila ka mga proyekto sa imprastraktura nga tuyo nga matapna ukon sa dimagkubos mabuhinan ang epekto sang pagbaha sa tagsa ka tion nga may mabaskog nga bagyo.
Dugang pa, ang ginatawag nga risk hot spots nagapabilin nga nakatutok sa Asya kag Amerika, subong man sa Africa nga padayon nga nagapakita sang pinakamataas nga level sang vulnerability sa bug-os nga kalibutan.
Sa pahayag sang World Risk Report, ginpahayag nga ang Pilipinas liwat nga yara sa pinakataas sang World Risk Index sini nga tuig bilang isa ka pungsod nga may mataas nga geographic fragmentation kag full exposure sa grabe nga epekto sang panahon.
