Nagpanguna ang Philippine aviation industry pagkatapos nga nakarekord sang pinakamadasig nga pag-uswag sa Southeast Asia sang Abril.
Base sa Official Airline Guide market data, ang flight capacity sang Pilipinas naglab-ot sa 5.82 million, nagapangatlo sa rehiyon kasunod sang Indonesia kag Thailand.
Naka-record man ang pungsod sang pinakadaku nga pagtaas sa sulod sang isa ka bulan nga may 687,000 ka dugang nga seats ukon 13.4% nga growth kon ipaanggid sang nagligad nga tuig.
Samtang, nagapabilin nga isa sa pinakamasako nga airport sa rehiyon ang NAIA nga may 2.91 million nga pasahero sang Abril.
Sa mga airlines, nagapanguna ang AirAsia sa kapasidad, ginsundan sang Cebu Pacific nga naka-record sang 20% nga pagtaas sang seats.
Apang, ginalauman nga bag-uhon sang pila ka mga airlines ang ila target bangud sa mataas nga presyo sang jet fuel kag nagaluya nga demand sa pila ka mga merkado.
