Nanindugan si US Indo-Pacific Command Commander Admiral Samuel Paparo nga ang deployment sang mga Typhoon mid-range capability (MRC) missile system sa Pilipinas ang para sa mga serye sang military exercises sa tunga sang US kag Philippine Military.
Ang mga nasambit nga missile system ang una nga gin-deploy sa Luzon sadtong Abril sa tuyo nga magamit ini para sa mga serye sang joint exercises.
Nangin kontrobersyal man ang deployment sang mga ini matapos manawagan ang Russia kag China sa US kag Pilipinas nga kakason na ukon ibalik na ang mga nasambit nga missile.
Suno kay Paparo, ang mid-range missile ang importante para sa ginahiwat nga military exercises sa tunga sang Pilipinas kag US; kabahin man suno diri ini sang kagustuhan sang duha nga militar nga mapataas pa ang kapabilidad sa nagkalain-lain nga aspeto sang military training kasubong sang paggamit sa mga Typhoon missile.
Matandaan nga anay na nga ginsambit sang Philippine Army nga posible nga kakason kag ibalik na sa US ang mga nasambit nga missile system pag-abot sang Setyembre ukon sa pagtakup sang Salaknib Exercises.
Apang, indi naman direkta nga gintuad ni Paparo kun kakason na gid man ang mga missile samtang, padayon suno diri nga paga-istudyuhan sang US kag Philippine military ang kinahanglanon kag kun ano pa ang maibulig sang mga missile system sa mga training.
Suno naman kay AFP Chief of Staff Gen. Romeo Brawner Jr., ang pagpasugot sa deployment sang mga missile system sa Pilipinas ang bangud na man sa kagustuhan sang Sandatahang Lakas ng Pilipinas nga maisa-moderno ang mga materyales nga ini.
Kabahin suno diri ini ang paghiwat sang taining gamit ang pinakaulihi kag pinakamoderno nga weapon system.
Suno pa kay Brawner, luyag man sang AFP nga makakuha sang mas modern nga mga missile kag iban pa nga weapon system, kalakip na diri ang kontrobersyal nga Typhon mid-range capability (MRC) missile system.
Ang ginahiwat nga training gamit ang mid-range missile ang kabahin lamang sang pagpreparar para diri.
