Ginpasiguro sang Philippine Coast Guard (PCG) kag sang Bureau of Fisheries and Aquatic Resources (BFAR) sa publiko nga indi sila magpapatinag sa tunga sang padayon nga agresyon sang China sa bahin sang West Philippine Sea.
Suno kay Commodore Jay Tarriela, spokesperson sang sang Philippine Coast Guard para sa West Philippine Sea, padayon nga ginapakita sang Philippine Coast Guard kag Bureau of Fisheries and Aquatic Resources ang ila mabakod nga panindugan sa pagpakigbato sang mga Pilipino nga mangingisda sa Kalayaan Island Group, apisar sang padayon nga agresyon sang mga barko sang China sa katubigan sang Pag-asa Island.
Ginpaathag ni Tarriela nga bisan pa sa mga taktika sang pagpanghadlok kag agresibo nga lihok sang Chinese Coast Guard kag Maritime Militia, nagapabilin nga mabakod kag determinado ang Philippine Coast Guard kag Bureau of Fisheries and Aquatic Resources sa ila misyon.
Suno pa sa iya, hindi sila magaatras o magapahuyang, bangud daku ang kahalagahan sang ila presensya sa Kalayaan Island Group agud maprotektahan ang katungdanan kag kabuhi-pangabuhian sang mga mangingisdang Pilipino.
Ginhimo ini nga pahayag ni Tarriela matapos nga ginbomba sang water cannon ang barko sang Philippine Coast Guard sang Chinese Coast Guard (CCG), kag hungod nga ginbangguan ang isa sa ila barko sa sulod sang teritoryo nga sakop sang Pag-asa Island, Domingo sang aga.
Suno sa impormasyon, samtang maayo ang pagdungka sang tatlo ka barko sang Bureau of Fisheries and Aquatic Resources sa katubigan sang Pag-asa Island,lakip na ang BRP Datu Pagbuaya sang nagluntad ang insidente.
Sa iya social media post, ginpahayag ni Tarriela nga gin-atubang gid nila ang peligro kag provocation nga maniobra sang China Coast Guard kag Chinese Maritime Militia ang mga barko sang Bureau of Fisheries and Aquatic Resources.
Suno sa iya, bandang alas-8:15 sang aga, pilit nga nagpalapit sa delikado nga pamaagi ang mga barko sang China kag ginbomba sang water cannon ang barko sang Bureau of Fisheries and Aquatic Resources, isa ka klaro nga banta sang agresyon.
Naglala ang tensyon pag-abot sang alas-9:15 sang aga, sang ginlatigo liwat sang water cannon ang BRP Datu Pagbuaya sang Chinese Coast Guard vessel nga may bow number 21559, kag napilasan ang barko.
Pagligad sang tatlo ka minuto, sadya nga ginbanggaan sang amo man nga barko sang China ang likod nga bahin sang Datu Pagbuaya.
Nakarekord sa video ang insidente kag nakita ang gamay nga kahalitan sa estruktura sang barko pero wala sang nasamaran ukon naperwisyo nga tripulante.
