Madinalag-on nga nahimo sang isa ka Italyano nga piloto nga si Dario Costa ang isa ka makatalagam kag makasaysayan nga aviation feat matapos nangin una nga tawo nga nagpahugpa sang eroplano sa ibabaw sang nagaandar nga tren.
Gamit ang iya Zivko Edge 540 nga eroplano, ginpahugpa ni Costa ang salakyan sa gamay nga runway sa katapusan nga tren antes maglupad liwat.
Suno kay Costa, ini ang pinakamabudlay kag pinakadelikado nga proyekto sa bilog niya nga career. Samtang ginahimo ang stunt, ang tren nagadalagan sa kadasigon nga 120 kilometers kada oras (75 mph).
Si Costa nagsalig lamang sa iya cognitive skills, instinct, kag hugot nga pagfocus agud nga matadlong ang alignment sang eroplano.
Magluwas nga indi niya makita ang landing spot, kinahanglan man nga pakigbatuan ni Costa ang mabaskog nga turbulence kag nagabag-obag-o nga hangin tuga sang nagahulag nga tren.
Sa katapusan, isa ini ka madinalag-on nga touchdown nga gilayon nga ginsundan sang isa ka makahalawathawat nga vertical pull take-off.
