ROXAS CITY – Ginsaysay sa Bombo Radyo sang isa ka Capizeño nga pinakauna nga nagpositibo sa coronavirus disease (COVID-19) sa probinsiya ang iya nga inagihan antes dalayon nga naka-recover sa nasambit nga balatian.
Sa eksklusibo nga interview sang Bombo Radyo kay Patient No. 13, residente sang banwa sang Jamindan, Capiz kag empleyado sang kapitolyo-probinsiyal, ginpahayag sini nga pangamuyo kag pagsalig sa Diyos ang nagpabakod sa iya nga buot nga magaayo ini kag dalayon nga mangin COVID-19 free.
Suno diri nga wala siya sang nabatyagan nga kahadlok bangud nagapabilin ini nga positibo nga siya ang magaayo bangud madamo ang nagapangamuyo para sa iya.
Sa karon wala na siya sang ubo, hilanat, pagpalanakit sang lawas kag nagbalik naman ang iya nga gana sa pagkaon.
Aminado si Patient No. 13 nga nangin mabudlay ang iya nga sitwasyon sa sulod sang isolation room samtang siya ang nagapaayo.
Mahibaluan nga 8 ka adlaw ini nga nagdugay sa Roxas Memorial Provincial Hospital Hospital antes gindala sa Western Visayas Medical Center sa siyudad sang Iloilo kun sa diin ginbulong naman ini sang 14 ka adlaw.
Tuman man ang pagpasalamat ni Patient No. 13 sa mga medical staff nga nagtutok agud dalayon siya nga mag-ayo.
