ROXAS CITY – Naka-rekober na sa coronavirus disease (COVID-19) ang pinakauna nga repatriated Overseas Filipino Worker (OFW) nga nag-positibo sa amo nga sakit sa probinsiya sang Capiz.
Ini ang sandig sa ginpaguwa nga COVID-19 Case Bulletin No.89 sang Department of Health (DOH) Region 6.
Mahibaluan nga ang nasambit nga OFW ang naga-edad sang 48-anyos , isa ka seafarer nga tumandok sang Barangay Switch, Tapaz, Capiz.
May history of travel ini sa Osaka, Japan kun sa diin sa pagpauli sa Pilipinas, nagtenir pa ini sa Cebu sa sulod sang pila ka bulan matapos nga naabtan sang lockdown.
Apang isa ini sa naka-avail sa repatriation program sang gobyerno kag kalakip sa nakasakay sa sweeper flight sa Iloilo kag ginsugat sang ambulance sang LGU sa banwa sang Tapaz kag nagdiretso sa quarantine facility sa amo nga banwa.
Ginpahayag nga ‘asymptomatic’ ang nasambit nga OFW ukon wala nakitaan sang anuman nga sintomas sang nasambit nga balatian.
