ROXAS CITY – Narekord sa Capiz ang pinakauna nga repatriated Overseas Filipino Worker (OFW) nga nag-positibo sa coronavirus disease (COVID-19).
Ini ang ba-se sa ginpaguwa nga datos sang Department of Health (DOH) Regional Office 6.
Mahibaluan nga ang nasambit nga OFW ang may edad nga 48 anyos, lalaki, kag residente sang Barangay Switch, sa banwa sang Tapaz.
Sa eksklusibo nga interview sang Bombo Radyo kay Tapaz Mayor Roberto Palomar, ginpahayag sini nga sadtong Hunyo 5 nag-abot ang amo nga OFW gikan sa Japan kag Hunyo 8 sang ginpaidalom ini sa real-time polymerase chain reaction (RT-PCR) test.
Ginkompirma man sang alkalde nga ‘asymptomatic’ ang nasambit nga OFW ukon wala nakitaan sang anuman nga sintomas sang nasambit nga balatian.
Sa karon, naka-hospital quarantine ang nasambit nga OFW sa Roxas Memorial Provincial Hospital nga nagserbi nga Provincial COVID-19 facility.
Naka-isolate naman ang iban pa nga repatriated OFW’s nga una nga nakaupod sang nasambit nga pasyente sang nagpaidalom ini sa facility quarantine sa nasambit nga banwa.
