Naghatag sang bulig-pinansyal ang Roxas City Government sa pila ka mga barangay, organisasyon kag indibidwal nga nagakinahanglan bilang kabahin sang padayon nga programa sang lokal nga panguluhan sa pagbulig sa komunidad.
Lakip sa gintugyan nga ayuda ang pondo para sa pagpatindog sang solar street lights sa relocation site sa Sitio Puntod, Barangay Dinginan, nga ginbaton ni Barangay Captain Dodong Corros.
Naghatag man sang suporta ang syudad sa Reynanay sang Barangay Baybay, kag sang pinansyal nga bulig kay Dorcel John Tumlos, nga magarepresentar sa Pilipinas sa World Championships of Performing Arts sa Las Vegas, Nevada, USA.
Nagbaton man sang bulig ang mga biktima sang kalamidad, lakip sanday Cydrik Tomasa kag Generoso Arabia, nga naapektuhan sang sunog, kag si Deidita Cuaba, nga naguba ang balay matapos matumbahan sang kahoy.
Suno sa Roxas City Government, ang paghatag sang sini nga mga bulig kabahin sang padayon nga tikang sang local government sa pagsuporta sa mga residente nga nagakinahanglan kag sa mga nagadala sang dungog sa syudad.
