ROXAS CITY – Tuman ang pagpasalamat kag kalipay nga nabatyagan ni Ms. Christy Lariosa isa sa mga contestants sang World Championships of Performing Arts (WCOPA) sa Estados Unidos, nga isa siya sa mga Pinay nga magarepresentar sang Pilipinas sa bug-os nga kalibutan.
Sa interview sang Bombo Radyo kay Lariosa, ginpahayag sini nga antes siya nakasulod sa nasambit nga paindis-indis una na sini nga nahibaluan ang amu nga patag bangud madamo man nga mga Pilipino ang nagpasimpalad nga magpasakop diri.
Ang WCOPA, ang nagsugod sadtong Hulyo 13 subong nga tuig kung sa diin kapin 34 nga mga pungsod ang nagpasakop kag 106 nga mga deligado ang nakasambuwa sini.
Sa nasambit nga numero sang mga deligado, ginkabug-usan ini sang mga kabataan nga naga-edad 9 ka tuig pataas kag 71-anyos naman ang may edad.
Suno kay Lariosa, masobra tunga man sa tuig ang iya pagpreparar antes magpaidalum sa amu nga pasinawan kung sa diin nangin madinalag-on ang nangin resulta sini.
Ginpahayag man sini nga ini ang iya labing una nga pagpakigbahin sang international sa nasambit nga patag.
Samtang, nagpalab-ot man sang pagpasalamat ang Pinay sa iya pamilya kag sa tanan nga nagahatag sang suporta sa iya karera.
