ROXAS CITY – Yara na sa kostodiya sang embahada sang Pilipinas sa Riyadh, Saudi Arabia ang Capizeña OFW nga nagpangayo sang bulig Bombo Radyo Roxas matapos nakapalagyo sa balay sang employer.
Sa interview sang Bombo Radyo Roxas kay Analyn Esquelador, utod sang OFW nga si Roselyn Bolido Rotolo, ginpahayag sini nga nagkaisog lamang nga magpalagyo ang utod bangud indi na sini masarangan ang trabaho kag indi nagakaigo ang ginahatag nga pagkaon sa iya.
Suno kay Esquelador, nakaangkon lamang sang kahigayunan ang utod nga makapalagyo matapos nabilin nga bukas sang employer ang pirtahan.
Bangud diri, gilayon nga nagsakay sa taxi ang biktima kag nagpadul-ong sa Philippine Embassy sa diin ini karon nagatenir.
Nagpangayo man ini sang pabor sa isa ka pinay sa embahada sang Pilipinas para mapalab-ot sa iya pamilya sa Capiz nga nakapalagyo na ini sa iya nga employer.
Kalakip sa ginareklamo ni Rotolo ang pagpaubra sa iya sang employer sa balay sang mga abyan sini, indi supisyente nga pagkaon nga ginahatag sa iya kag ang ginasiling pagpreso sa iya sa sulod sang balay.
