Ginbanatan ni Senator Ping Lacson ang ginapahayag blackmail style sang contractor nga si Curlee Discaya batok sa pila ka mga myembro sang Kamara de Representantes kag mga opisyal sang Department of Public Works and Highways ukon DPWH.
Sa isa ka interview, ginsiling ni Lacson nga kaangay ginpahog ni Discaya ang mga mamalidha nga ibutang ang pangalan sang mga ini sa iya nga ledger kun indi magbayad sang utang.
Ang nasambit nga utang ang ginaalegar nag-ugat sa mga advance ukon komisyon nga nakuha sang mga pulitiko para sa mga proyekto nga napornada matapos ang kontrobersyal nga flood control scandal.
Suno sa senador, kaangay gin-ako man sa iya ni Discaya ang nasambit nga modus sang ginkompronta niya ini.
Naga-guwa sa impormasyon sang senador nga naglab-ot sa P30-million tubtob P40-million ang ginasukot sang contractor sa mga indibidwal para lang nga indi malakip sa listahan.
Paathag ni Lacson, ini bangud nga ginakuha na gilayon sang mga mamalidha ang ila nga parte apisar nga yara pa lamang sa National Expenditure Program ukon NEP ang proyekto.
Bangud nga wala madayon ang proyekto, ginbawi subong sang contractor ang una nga ginbayad sini.
Sa ulihi, hugot nga ginsiling ni Lacson nga kinahanglan nga kabigon na lamang nga charge to experience sang mga naulamid ang natabo bangud nagpusta sila sa mga proyekto nga wala sang kasiguraduhan.
