ROXAS CITY – Ginapahanumdum ang publiko sang tagdumalahan sang Pink Mansion agud malikawan nga malatnan sang Human Immunodeficiency Virus ukon HIV-AIDS.
Sa interview sang Bombo Radyo sa Presidente sang Pink Mansion nga si Mr. Michael O.Alejaga-RMT, ginpahayag sini nga mahimo malatnan ang isa ka persona sang HIV-AIDS pinaagi sa: unprotected sex; blood transmission kag mother to child.
Suno kay Alejaga, nagabatyag sang sintomas ang isa ka persona nga posible may AIDS kaangay sang pabalik-balik nga lagnat, galingin ang ulo, nagasuka-pamuhin.
Madamo nga mga indibidwal ang may HIV nga wala sang anu man nga sintomas sa sulod sang madugay nga panahon kag masiling nga mapagros ang panglawason.
Isa ini sa mga rason nga importante masami nga magamit sang proteksyon sa tion nga makighilawas, may sakit man ukon wala.
Wala sang bulong para sa HIV, sa tion nga may yara na sang virus ang isa ka indibidwal apang bangud sa antiretroviral nangin giya ini agud mangin mabuhi sang malawig ang mga biktima kaangay sang normal.
Sa pihak nga bahin ang AIDS, ukon Acquired Immunodeficiency Syndrome, ang delikado kag mahimo nga makamamatay dala HIV.
Ini ang impeksyon sa HIV kung ang immune system tuman na ka luya kag mahina.
Kung aminado ka sa imo kaugalingon nga nagapakighilawas sa multiple partners nga wala sang nagakaigo nga proteksyon, indi malayo nga makaangkon sang nasambit nga balatian.
Indi man mapasa ang amu nga balatian pinaagi sa paghalok, paghakos ukon sa pagkaptanay sang kamot.
