Magapatuman ang Department of Social Welfare and Development (DSWD) sa bulig sang National Economic and Development Authority (NEDA) kag Department of Labor and Employment (DOLE) sang bag-o nga sistema para sa mas masusi nga assessment sang mga benepisyaryo sang Ayuda Para sa Kapos ang Kita Program (AKAP).
Ini ang kasunod sang nangin pakig-angut sang mga nasambit nga ahensya para istoryahan ang mga posible pa nga improvements sang programa.
Sa isa ka pahayag, gin-athag ni DSWD Secretary Rex Gatchalian nga nagdisenyo sang makabag-o nga sistema ang ahensya suno sa nangin veto message ni Presidente Ferdinand Marcos Jr. nga nagatuyo nga ihatag ang mga kinahanglanon sang mga maapektuhan sang inflation nga mga nagakita sang mas manubo pa sa minimum nga sweldo.
Diri, mas masukat kun matuod nga naapektuhan ang mga benipisyaryo sang inflation ukon sang mga nagataas nga presyo sang mga balaklon sa merkado.
Samtang, ginsiguro man ni Gatchalian nga ang mga guidelines sang programa ang magapalayo sa mga political influence agud malikawan ang mga isyu sang pamulitika sang kwarta sang bayan.
Padayon naman ang ginahimo nga pag-amyenda sang mga ahensya sa mga polisiya kag sistema sang pagkilala sang mga benepisyaryo sang nasambit nga programa.
