ROXAS CITY – Nagkalain lain nga grupo sang mga pinoy nurses ang boluntaryo nga naghatag sang ila serbisyo sa mga nagamasakit nga labi nga naapektuhan sang nagpanalasa ang bagyo nga Harvey sa Houston, Texas.
Sa interview sang Bombo Radyo Roxas kay Sarah Barcelona, 15 na ka tuig nga nagatrabaho bilang nurse sa Houston, Texas, ginpahayag sini nga sila nga pito ka mga mag-abyan nga nurses ang nagvolunteer para magbulig sa mga nagamasakit nga indibidwal nga ginadala sa temporary kag mobile hospital nga nagaserbe man nga evacuation center.
Suno kay Barcelona ginhimo nila ang nasambit nga tikang bilang pasalamat nga wala sila tuman nga naapwektuhan sang pagbaha, indi kasubong sang iban nga nadulaan na sang balay, nadulaan pa sang mga mahal sa kabuhi.
Magluwas sa medical services nga ginahatag sa mga nagamasakit, nagbuligay man ang iban nga mga Pilipino sa nasambit nga komunidad para makahatag sang ila bulig.
Ginpabatyag man sang mga Pinoy sa Houston ang bayanihan system nga masami ginahimo sa Pilipinas para ipakita ang pagbulig sa isigkatawo.
Sa karon suno kay Barcelona nga nagalab-ot na sa 9,000 ka mga evacuees ang naka-avail sang magkatuhay nga serbisyo.
