Naglab-ot na sa P1.91 billion ang kabug-usan nga kantidad sang kahalitan sa sektor sang agrikultura bangod sa mabaskog nga Southwest Monsoon ukon Habagat kag sang mga nagligad nga bagyo nga Luis, Maymay kag Neneng, suno sa Department of Agriculture (DA).
Base sa pinakabag-o nga assessment sang mga regional office, 61,237 ka mangunguma ang naapektuhan, samtang sobra 54,611 ka ektarya sang agricultural areas ang nahalitan.
Ginalantaw nga 7,772 metric tons sang agricultural commodities ang nadula sa produksyon.
Pinakadaku ang pinsala sa humay, nga naglab-ot sa P1.07 bilyon, samtang P610.32 milyon naman ang na-record nga losses sa high-value crops.
Lakip sa mga naapektuhan nga tanom ang mga utanon, spices, legumes, kag mga prutas pareho sang avocado, calamansi, citrus, durian, lanzones, mangosteen, melon, papaya, pineapple, rambutan, strawberry kag watermelon, pati na man ang saging, mangga, root crops kag ornamental crops.
Nagalab-ot naman sa P92.68 milyon ang pinsala sa mais, samtang P23.62 milyon ang losses sa produksyon sang cassava.
Samtang, naglab-ot sa P16.27 milyon ang pinsala sa livestock, lakip ang mga manok, baboy, baka, kabaw, kanding, karnero, pato, koneho kag iban pa nga mga sapat nga ginahupot.
Naguba man ang mga irrigation facilities nga nagabalor sang P60.96 million, samtang P16.37 million ang pinsala sa farm structures kag P1.91 million naman sa mga machinery kag equipment.
Sa fisheries kag aquatic resources, naglab-ot sa P9.26 milyon ang na-record nga losses.
Bilang bulig sa mga naapektuhan nga mangunguma, ginsiling sang DA nga may yara sang P237.99 milyon nga balor sang agricultural inputs, lakip ang mga binhi sang humay, mais kag utan, nga mahimo ipanagtag.
Mahimo man sila makakuha sang pautang tubtob P25,000 sa idalom sang Survival and Recovery ukon SURE Loan Program sang Agricultural Credit Policy Council.
Samtang, magahatag ang National Food Authority sang 3,631 ka bags sang milled rice sa mga apektado nga local government units sa Ilocos Region, Cagayan Valley, Central Luzon kag MIMAROPA.
Nag-deploy man ang Department of Agriculture sang mga KADIWA trucks para sa transportasyon sang agricultural commodities kag pagdala sang bulig sa mga naapektuhan nga lugar.
