ROXAS CITY – Madamo pa sang mga nakalinyada nga mga proyekto nga luyag ipatuman si Congressman Howard Guinto sang Pinuno Partylist sa probinsya sang Capiz.
Sa interview sang Bombo Radyo kay Guinto, ginpahayag sini nga ang pondo sang mga proyekto ang nagikan sa Department of Social Welfare Development (DSWD) sa idalum nanday Speaker of the House of Representatives Martin Romualdez kag Ilocos Norte Congressman Ferdinand Alexander “Sandro” Araneta Marcos.
Mahibaluan pila sa mga programa nga ginapatuman sang Pinuno Partylist sa probinsya ang road project, school building, multi-purpose hall, solar water system kag ang pagtan-ay sang school assistance.
Ginpahayag man ni Guinto nga positibo siya nga mapadayon ang nasambit nga mga proyekto samtang ini ang nagapungko kag nagaserbisyo sa pungsod subong man sa mga labing nagakinahanglan.
Samtang, target sang Pinuno Partylist nga mahatagan ang masobra 7,000 nga mga estudyante antes magtakop ang 2023.
