ROXAS CITY – Ginbuyagyag sang pinuno sang Lupong Tagapamaya sang Barangay Milibili, Roxas City nga ang mga dokumento lamang gikan sang tuig 2018 ang natugyan sa iya ni anay punong barangay kag karon City Councilor Midelo Ocampo.
Suno kay Felix Totong Apurada, ginhambalan siya ni Ocampo nga taguon sini ang amo nga dokumento kag iya man nga pagatun-an.
Ang amo nga dokumento suno kay Apurada ang gin-tsekyar sang mga katapo sang Department of Interior and Local Government (DILG) sang nagpasakop ang barangay sa Lupong Tagapamayapa Incentives Award-Component City Category sang tuig 2019.
Apang ginklaro ni Apurada nga wala siya sang ihibalo kun sa diin ang mga dokumento sang Lupon Tagapamayapa sang barangay humalin Enero tubtob Hunyo 2019.
Suno sa iya nga sang nagpungko na ang bag-o nga punong barangay nga si Annabelle Roxas, wala na ang mga dokumento sa nasambit nga mga binulan kag indi man nila mapat-od kun sa diin na ini nagkadto.
