ROXAS CITY – Wala pa sang ideya ang Public Information Officer sang provincial government kun nakasumiter na sang sabat si Roxas City Mayor Ronnie Dadivas natuhoy sa plano nga himuon bilang isolation facility sang mga asymptomatic COVID-19 patients ang Capiz Gymnasium, Villareal Stadium.
Sa pagpakig-angut sang Bombo Radyo kay Atty. Vicente Atlas Catalan ginpahayag sini nga indi na mapunggan pa ang pagpahamtang sang isolation facility bangud may yara na ini sang mando gikan sa National Inter-Agency Task Force sa pihak nga magpamatuk pa ang alkalde sang siyudad.
Suno kay Catalan nga tinutuyo sang isolation facility nga tipunon sa isa ka lugar ang mga asymptomatic patients agud malikawan ang paglapta sang virus sa probinsya.
Dugang pa sini nga indi lamang mga pasyente gikan sa mga kabanwahanan ang ibutang sa pasilidad, kalakip na diri ang pasyente nga gikan sa siyudad.
Gin-athag man sini nga kinahanglanon ang quarantine facility bangud nagadamo na ang kaso sang COVID-19 sa probinsiya.
Samtang, nagpanawagan naman si Catalan sang suporta sa mga pumuluyo kag nagapangabay nga maghugpong kag mag kooperar agud malikawan ang paglapta sang COVID-19 sa probinsya.
