Padayon nga nagaluya ang peso batok sa dolyar matapos nga narekord ang exchange rate sang P59.38 kada US Dollars, isa sa pinakamahuyang nga lebel subong nga tuig.
Suno sa report gikan sa bangko kag financial monitoring firms, ang demand para sa dolyar nagapabilin nga mabaskog bangud sang malig-on nga ekonomiya sang Estados Unidos kag mas mataas nga interes sa ila merkado.
Sa Pilipinas, ang pagluya sang piso ang kabangdanan sang pagtaas sang presyo sang mga imported nga produkto, partikular ang langis, nga may direkta nga epekto sa pamasahe kag presyo.
Base sa datos, naglab-ot sa mataas nga P59.50 ang dolyar sang Enero 14 kag nagnubo sa P57.53 sang Pebrero 25, antes liwat nga nagbaskog subong nga Marso.
Samtang, ang mga pamilya nga nagabaton sang remittances halin sa overseas Filipino workers (OFWs) ang nakabenepisyo bangud mas dako ang balor sang dolyar kon ipaangid sa piso.
Apang, para sa mga lokal nga konsumidor, nabatyagan ang dugang nga palas-anon sa adlaw-adlaw nga mga galastuson.
Padayon naman ang monitoring sang Bangko Sentral ng Pilipinas (BSP) sa sitwasyon kag nagapaguwa sang Daily Reference Exchange Rate Bulletin agud i-guide ang merkado kag financial institutions.
