Dismayado ang PISTON-Capiz sa mando ni President Ferdinand Marcos Jr sa Department of Transportation nga i-suspende ang fare hike.
Sa interview sang Bombo Radyo kay Mr. Joebert Carrandang, Presidente sang Piston Capiz Chapter, iya ginpahayag nga makabulig na kuntani sa transport sector ang pagdugang sang pamasahe apang ginbawi pa ini sang Presidente.
Suno kay Carrandang, ang pagbag-o bag-o sang desisyon sang gobyerno daw kaangay gina-ekspermintuhan lang ang mga drivers kag operators kag wala ginaseryoso ang matuod nga problema nga ginapangatubang sang Pilipinas.
Pahayag pa niya, madamu na sang mga drivers ang nag-untat sang pagbyahe kag nagpangita na sang iban pa nga palangabuhianan bangud man sa pagtaas sang presyo sang gatong tuga sang padayon nga tension sa Middle East.
Nahibaluan nga kahapon nga adlaw ginbawi ni President Ferdinand Marcos Jr. ang pagpatuman sang fare hike agud mapahagan-hagan ang palas-anon sang mga commuters, lakip na ang mga trabahador kag estudyante.
Nagpanawagan naman ang natungdan nga tun-an sang maayo sang gobyerno ang pagpatuman sang solusyon agud indi maghatag sang dugang nga kabudlayan indi lang sa mga transport sector kundi sa bug-os man nga Pilipinas.
