Gin-athag sang Pinagkaisang Samahan ng mga Tsuper at Operator Nationwide ukon PISTON-Capiz nga ang pagsaka sang pamasahe sang mga pampubliko nga transportasyon isa lamang ka band-aid solusyon bangud padayon man nga sa gihapom mga nagasaka ang presyo sang gatong.
Base sa bag-o nga taripa, ang traditional jeepney yara sa P14 ang first 4 kilometers, halin sa P13, samtang P2 ang dugang sa kada kilometro, halin sa P1.80. Para naman sa modern jeepney, P17 ang first 4 kilometers, halin sa P15, kag P2.40 ang dugang sa kada kilometro, halin sa P2.20.
Sa interview sang Bombo Radyo kay Joebert Carandang, chairman sang PISTON-Capiz, iya ginpahayag nga ang pagsaka sang pamasahe isa lamang ka pagpalubag-loob sa mga driver bangod indi sini masolbar ang padayon nga pagsaka sang presyo sang gatong.
Suno kay Carandang, kinahanglan nga kanselahon sang Oil Deregulation Law bangod limitado ang kontrol sang gobyerno sa pagsaka sang presyo sang mga produktong petrolyo.
Nagapanawagan man ang grupo sa gobyerno nga suspindihon ang excise tax sa petrolyo agud mabuligan ang mga driver kag operators sa padayon nga pagataas sang presyo sang gatong.
