Nagpanawagan sang fuel subsidy ang Pinagkaisang Samahan ng mga Tsuper at Operator Nationwide (PISTON)-Capiz sa gobyerno para sa mga jeepney drivers kag operators kasunod sang nagapadayon nga tensyon sa Middle East nga nagresulta sa pagsaka sang presyo sang gatong.
Sa interview sang Bombo Radyo kay Joebert Carandang, chairman sang PISTON-Capiz, iya ginpahayag nga dako gid ang epekto sang oil price hike sa pangabuhi sang ila mga miyembro bangod naganubo ang kita samtang nagasaka ang ila operational expenses.
Suno kay Carandang, dako man ang mangin epekto sini sa bug-os nga sektor sang transportasyon kag posible nga magtuga sang inflation, nga magresulta sa pagsaka sang presyo sang mga balaklon sa merkado.
Dugang pa sini, kon magapadayon ang pagsaka sang presyo sang langis, mahimo man nga posible nga magapatigayon man sang protesta ang ila grupo bilang pahayag sang ila panawagan.
Magluwas sina, nagapanawagan man ang transport group sang traditional fare increase nga Piso para sa dugang nga pamasahe kag temporaryo nga pagpanubo ukon pag-untat sang 12 percent VAT kag excise tax sa fuel products agud makaginhawa ang mga drivers sa tunga sang krisis.
Ginpahayag man sini, nga ginaproseso na sang DOTr ang paghatag sang fuel subsidy para sa mga public utility vehicle drivers.
Gin-engganyo man sini ang mga drivers kag operators nga may problema sa ila fuel subsidy card nga mahio magkadto sa Land Bank of the Philippines agud ipa-validate ini agud makabenepisyo sa subsidy program sang DOTr kag Land Transportation Franchising and Regulatory Board (LTFRB).
