MANILA-Nag-atubang sang kabudlayan sa pagpangita sang masakyan ang mga commuter sa Metro Manila samtang opisyal nga ginlunsyar sang transport group nga Piston ang duha ka adlaw nga nationwide transport strike subong ng adlaw, Setyembre 29.
Ginpatigayon sang Piston ang panguna nga protest center sa Aurora Boulevard, Cubao, Quezon City, bilang panawagan sa gobyerno nga ipaubos ang presyo sang petrolyo kag kuhaon ang value-added tax ukon VAT kag excise tax sa petroleum products.
Suno kay Piston President Mody Floranda, ginapanawagan man sang grupo ang gilayon nga pagbasura sang Oil Deregulation Law, nga suno sa iya, naglimit sa awtoridad sang gobyerno sa pagmonitor sang presyo sang petroleum products. Ginapadayon man sang grupo ang petisyon para sa P10 nga dugang sa pamasahe.
Samtang, nagtinguha ang mga commuter nga makakita sang alternatibo nga masakyan bangud limitado ang nagabiyahe nga jeepney sa pila ka lugar. Ang iban nagmotorcycle taxi ukon nag-e-bus agud makakadto sa trabaho, samtang may mga commuter nga nagpahayag sang pagsuporta sa panawagan sang mga tsuper.
Ginalauman nga magalab-ot sa 70 mil tubtob 100 mil nga jeepney drivers kag operators ang mag-upod sa nationwide transport strike nga magapadayon tubtob bwas nga adlaw, Setyembre 30.
