Nadakpan ang pito ka Chinese nationals nga lunsay lalaki bangud ginaalegar may kahilabtan sa ginapatigayon nga illegal mining operation sa Libona, Bukidnon.
Sa pahayag sang Philippine National Police (PNP), ginpangunahan sang Department of Environment and Natural Resources (DENR) ang operasyon nga ginpatigayon sa isa ka lugar nga ginreport nga naga-operate sang ilegal nga pagmina.
Sa ginpatigayon nga raid, nakit-an sang mga otoridad ang malapad nga tunnel nga ginakuhaan sang mineral.
Narekober man ang mga mabug-at nga kagamitan pareho sang mga dump truck, backhoe, daku nga mga generator set, kag mga planta sa pagproseso sang mineral mining.
May nakuha man nga mga commercial explosives nga wala sang nagakaigo nga permit kag copper ore nga ginapatihan resulta sang iligal nga operasyon.
Gilayon naman nga gindala sa kustodiya sang mga otoridad ang pito ka Chinese nationals, samtang nagapadayon ang imbestigasyon agud mahibaluan ang kadalumon sang iligal mining kag kun may mga opisyal nga yara sa likod sang illegal mining.
Apang nagapanawagan naman ang DENR kag PNP sa publiko nga i-report sa mga otoridad kun may makita nga tawo nga ginasuspetsahan ukon iligal nga nagamina bangud nagadala ini sang daku nga paglapas sa ekonomiya sang Pilipinas.
