Diri sa aton sa Pilipinas, talagsahon kalang makakita sang ginatawag nga true friend bangud kon kaisa may barkada kaman pero galibakanay man.
Apang didto sa Guangzhou, China Literal nga “Best Friends Forever” ang Pito ka mga babaye nga mag-abyan matapos nila natuman ang ila madugay na nga handom nga magkabuhi nga magkaupod sa ila katigulangon.
Masobra 20 ka tuig na nga mag-abyanay ang pito ka mga babaye kag sang 2008 nagpromisa sila nga sa tion nga mag-retired sila maga-updanay na sila sa isa ka balay.
Sa pihak sang pagligad sang madamo nga mga tinuig, wala nila ginkalimtan ang ila promisa kag naghimo sila sang paagi agud matuman ini.
Ang mga mag-abyan nagbuligay kag nagbakal sang 700-square-meter nga propiedad sa Guangzhou nga nagabalor sang ginabanta $580,000.
Ginpanami nila ini kag ginpa-ubra bilang isa ka retirement home kon sa diin sila makatipon, makatrabaho sang ululupod kag maka-enjoy.
Para sa pito ka mag-abyan, indi lang ini pagbakal sang balay kundi pamatuod ini sang matuod nga pag-abyanay.
