ROXAS CITY– Dakop ang pito ka mga indibidwal samtang isa ang nakapalagyo matapos nga ginsalakay sang mga otoridad ang isa ka Drug Den sa Barangay Punta Tabuc, Roxas City.
Ang mga nadakpan amo sanday alyas “Josh”, alyas “Ken”, alyas “Samuel’, alyas “John”, alyas “Leonard”, alyas “Ryan”, alyas “Christy” nga lunsay mga parokyano kag residente sa syudad sang Roxas. Samtang nakapalagyo naman si alyas ‘Reynaldo” nga amo ang subject person sa operasyon.
Sa interview sang Bombo Radyo kay Jose Ramir Batuigas, PDEA Provincial Director, iya ginpahayag nga madugay na ini nga nagagamit sang iligal nga droga ang mga nagkaladakpan.
Dugang pa sini, nagapanimaho pa sang labno ang mga nadakpan matapos ang mga ini nagtuyo nga magpalagyo. Narekober naman sang mga otoridad ang napulo ka sachets sang ginapatihan illegal nga droga, mga drug paraphernalia, disposable lighters, cellphone kag P1, 000 nga marked money.
Nahibaluan nga ang operasyon ang ginkasa pamaagi sa gintingob nga pwersa sang Philippine Drug Enforcement Agency (PDEA) Capiz kaupod ang mga katapo sang Roxas City PNP.
Nagapangatubang sa kaso nga paglapas sa Republic Act No. 9165 ukon Comprehensive Dangerous Drugs Act of 2002 ang mga nagkaladakpan.
Sa karon, yara na ang mga ini sa kustodiya sang Philippine Drug Enforcement Agency (PDEA) Capiz para sa nagaka-igo nga desposisyon.
Mensahe naman ni Batuigas, para sa mga nagagamit sang iligal nga droga nga untatan na kag i-avail ang gina-offer sang gobyerno agud nga magbag-o sila kag makabalik sa sabak sang gobyerno.
