ROXAS CITY – Nagdihon sang resolusyon ang pila ka mga barangay officials sa banwa sang Sapian agud pahalinon sa puwesto ang ila sini nga Presidente sang Liga ng mga Barangay sa nasambit nga banwa.
Mahibaluan nga Pito ka mga Punong Barangay sa nasambit nga banwa ang nagpirma sa petisyon nga sipaon sa puwesto bilang Liga ng mga Barangay President nga si Punong Barangay Gina Yello.
Sa interview sang Bombo Radyo kay Punong Barangay Enrique Eroy, Vice President sang Liga ng mga Barangay sa nasambit nga banwa ginpahayag sini nga nadesisyonan sang pito ka mga Punong Barangay nga sipaon sa puwesto si Yello bangud sa kapaslawan sini nga magpatigayon sang sinapol kada bulan.
Suno kay Eroy nga isa ka beses kada bulan ang ila regular nga sinapol apang pila na kabulan nga wala ini nahimo ni Yello.
Kalakip sa mga reklamo sang mga nasambit nga punong barangy amo ang kakulangan sini sang plano kag programa sa mga kabarangayan sa nasambit nga banwa kag kapaslawan sini nga mahatagan sang pagtamod sa kaayuhan ukon general welfare sang Liga.
Ang nasambit nga petisyon ang ginpadala sa talatapan ni National Liga ng mga Barangay President Eden Pineda kag Capiz Provincial Liga ng mga Barangay President Querubin Pamplona.
Samtang tatlo naman ka mga punong barangay ang wala nagpirma sang petisyon batuk kay Yello.
Kalakip sa mga punong barangay nga nagpirma sang petisyon amo sanday Punong Barangay Reynaldo Jamero, Merlyn Peniano, Gregorio Labanza, Pancho Horario, Enrique Eroy, Romeo Urdas kag Noriel Perlas.
