ROXAS CITY – Mainit nga ginaistoryahan subong sang mga US Citizens kag Filipino Community sa California, USA ang “Cyber Attack” nga ginaalegar sudlon sang Russia kag Iran kadungan sang nagahilapit nga US Presidential Election sa Nobyembre 3, 2020.
Sa report ni Bombo International Correspondent Gabriel Ortigoza sang Barangay Switch, Tapaz, Capiz kag isa ka registered nurse kag nagatrabaho sa University of California, Davis kag California States University nga ginaistoryahan sa nasambit nga states ang Cyber Attack kun sa diin tuyo sudlon sang Russia kag Iran ang voting system sang US Presidential Election.
Suno kay Ortigoza nga ginabantayan na subong sang US Federal Intelligence ang plano nga Cyber Attack sa maabot nga eleksyon.
Mahibaluan nga nagapanguna sa gihapon sa popular votes ukon sa partially US Presidential Election Polls survey si Former Vice President kag Democratic Presidential Candidate Joe Biden kun ikumparar kay US Pres. Donald Trump.
Ginkompirmar man sini nga nagapanguna si Biden sa California apang indi man tanan bangud may yara sa gihapon sang mga Republicans nga pabor sa pagdumala ni Trump rason nga indi man dapat nga mangin kumpyansa ang Democrats.
Mahibaluan nga kadam-an sa mga American citizens sa California ang nagpabor kay Biden nga mangin masunod nga presidente sang Estados Unidos.
Ini bangud suno kay Ortigoza nabal-an na sang mga residente sa amo nga states ang kapabayaan ni Trump kun sa diin kalakip na diri ang padayon nga Wildfire kag ang kakulangan sang COVID-19 response subong nga pandemya.
Mahibaluan nga ang California ang may pinakamadamo nga electoral college votes sa Estados Unidos kun sa diin naglab-ot sa 55.
