ROXAS CITY – Daku ang mabulig sa pangabuy-anan sang mga pumuluyo sa Olotayan Island, kun madayun ang plano nga pagdevelop kag pagpahamtang sang negosyo sa nasambit nga lugar.
Ini ang ginpahayag ni Mr. Manuel Aninang, anay Punong Barangay sang Olotayan sang mainterview sang Bombo Radyo.
Ginkumpirmar ni Aninang, nga may mga foreigner ang nagpadulong sa isla agud tsekyaron ang lugar.
Pananglitan madayon ang plano nga investment, makatuga ini sang madamo nga trabaho para sa mga pumuluyo kag mapahagan-hagan ang ila kabudlayan.
Matandaan, sa separado nga interview kay Atty.Luvim Amores, Public Information Officer sang probinsyal capitol ginsiling sini nga may grupo sang Chinese Investors ang nagpabutyag sang interes nga magpahamtang sang negosyo sa Olotayan Island.
Samtang, gintuad man sini nga sa karon, nabudlayan sila sa pag-access sang tubig kag nagapadulong pa sa Barangay Banica agud makakuha sang tubig.
Gani, panawagan sini nga buligan sila nga makaangkon sang kaugalingon nga tubig.
