ROXAS CITY – May plano na ang punong barangay sang Barangay Baybay, sining syudad, pananglitan nga mapahamtang sa posisyon bilang presidente sang Liga ng mga Barangay Roxas City chapter.
Ini ang nangin pahayag ni Punong Barangay Reynaldo Magallanes kasunod sang naglapta nga report nga siya ang ipahamtang nga presidente sang Liga ng mga Barangay ni mayor elect Ronnie Dadivas kabaylo ni Punong Barangay Virgilio ‘’Yoyo’’ Santos sang Barangay Talon.
Ginkumpirma ni Magallanes nga antes pa ang eleksyon sang nagligad nga bulan sang Mayo, gintanyagan siya ni Dadivas nga magpadalagan bilang city councilor sa idalum sang Liberal Party, apang nagpamalibad ini.
Ikaduha nga bes nga nagpakigkita sa iya si Dadivas, gintanyag na sa iya ang posisyon sa pagka-presidente sang Liga nga wala sini ginpamalibaran.
Ginbaton ni Magallanes ang offer sang magapungko nga bag-o nga alkalde sang syudad, bangud ginakabig niya ini nga isa ka opurtunidad kag onor nga mapahamtang sa amo nga posisyon.
Samtang aminado man si Magallanes nga close sila nga duha ni Kapitan Yoyo Santos sa diin sang nagkit-anay sila nga duha wala na-estoryahan ang ini nga topiko, bangud ginarespeto nila ang kada isa.
Ginhinyo lamang sang punong barangay nga kuntani respetuhon anuman ang mangin desisyon sang alkalde sang syudad pag-abot sa plano sini nga magpahamtang sang bag-o nga presidente sang Liga ng mga Barangay.
