Ginakabig sang House Prosecution Panel ang plano sang iya defense team nga magpalapit sa Korte Suprema bilang posible panibag-o nga tikang agud ma-delay ang impeachment trial ni Vice President Sara Duterte.
Ini nga pahayag kasunod sang ginpahayag ni defense spokesperson Atty. Michael Poa nga handa sila nga i-refer sa Korte Suprema ang isyu sang kinahanglanon nga numero sang boto agud mapamatbatan ang Bise Presidente sa impeachment trial sa Senado.
Matandaan nga sang Setyembre 23, ginboto sang Senate Impeachment Court nga panubuan ang voting threshold ukon ang kinahanglanon nga numero sang boto sa impeachment proceedings kon sa diin 13 ka mga senador ang pabor kag si Presiding Officer Chiz Escudero lang ang nagapamatok.
Suno kay Rep. Zia Alonto Adiong, spokesperson sang House Prosecution Panel, nagpaguwa na sang desisyon ang Korte Suprema sa amo man nga bagay sadtong Setyembre 30 sang ginbasura sini ang separado nga mga petisyon ni Atty. Victor Rodriguez, Atty. Ernesto Francisco Jr., kag Berteni Cataluña Causing bangud sa kakulang sang legal standing kag premature nature sang mga reklamo.
Ginhatagan pagtamod ni Adiong nga apisar kinamatarung sang defence team nga magdangop sa Korte Suprema, posible nga magapabilin ang desisyon sang korte bangud ang subject matter kag legal arguments pareho lang sa mga nauna nga ginbasura nga mga petisyon.
