ROXAS CITY – Gindepensahan karon sang provincial administrator ang nakasugtan nga sa Davao patigayunon ang Strategic Planning seminar kag Executive Legislative Agenda (ELA) sang mga department heads kag board members sini nga bulan sang Oktubre.
Ginpahayag ni Dr. Edwin Monares nga nadihon ini nga plano pinaagi sa collective agreement sang mga department heads.
Ginpasiguro sang opisyal nga indi dehado ang mga pumuluyo, bangud tatlo ang aktibidad nga patigayunon sa isa lamang ka lugar.
Suno diri nga magluwas sa Strategic Planning seminar kag Executive Legislative Agenda (ELA) magapatigayon man sila sang benchmarking sa turismo, eco tourism, ,computerization, rescue 911 kag pila pa ka mga programa nga ginapatuman sa Davao.
Pinaagi diri makadihon sila sang mga programa nga ipatuman sa probinsiya sang Capiz.
Ginpanindugan man ni Monares nga may pondo nga gamiton para sa magaupod sa aktibidad sa Davao nga ginalakipan sang transportation expenses kag hotel accommodation.
Ginpaathag pa sang administrador nga importante ang pagplano para sa mga programa nga ipatuman sa probinsiya, sa diin dapat makabenepisyo diri ang mga pumuluyo.
