Positibo nga ginbaton sang Department of Education (DepEd) Region VI ang pahayag ni Pangulong Ferdinand R. Marcos Jr. nga pangitaan sang pondo ang pagpapatindog sang dugang nga classroom sa mga pampubliko nga eskwelahan sa Western Visayas bilang sabat sa kakulangan sang pasilidad sa edukasyon sa rehiyon.
Sa interview sang Bombo Radyo kay Cristito Eco, Regional Director sang DepEd Region VI, iya ginpahayag nga importante ang amo nga plano sang gobyerno agud masolusyunan ang nagadamo nga kinahanglanon sang mga eskwelahan, labi na sa mga lugar nga kulang pa gid sang classroom bangud sa padayon nga pagdamo sang mga estudyante.
Suno kay Eco, ang bastante nga classroom may dako nga bulig sa kalidad sang pagtuon sang mga kabataan kag makapaayo man sa kondisyon sang pagtudlo sang mga manunudlo.
Nahibaluan nga ginpatigayon man ang mass oath-taking sang linibo ka newly promoted teachers kag school heads sa Western Visayas nga ginhiwat sa Villareal Stadium sa Roxas City, Capiz kun sa diin may 2,467 ka participants gikan sa Aklan, 154 ka participants gikan sa Antique, 2, 191 ka participants sa probinsya sang Capiz, 443 ka participants gikan sa Guimaras, 2,005 ka participants gikan sa Iloilo , 264 ka participants gikan sa Iloilo City, 264 ka participants gikan sa Passi City kag 423 ka participants gikan sa Roxas City.
Ini ang gintambungan ni President Ferdinand Marcos Jr., First Lady Liza Araneta Marcos, kag Education Secretary Angara bilang pagkilala sa bag-o nga katungdanan sang mga manunudlo kag school heads.
Sa iya mensahe,ginhatagan sini sang importansya ang mayo nga pagtamdanay sang national kag local government para mapa-uswag ang serbisyo sa edukasyon.
Nagalaum man ang natungdan nga mapondohan ang proyekto sa labing madali nga panahon agud maumpisahan ang pagpapatindog sang dugang nga classroom sa Western Visayas.
