Nakadepende sa Department of Justice ang pag-file sang komento ukon pagpanginwala sa plano sang kampo ni Kingdom of Jesus Christ leader Pastor Apollo Quiboloy nga mag-petisyon agud mabalhin ini sa kustodiya sang Armed Forces of the Philippines ukon sa idalom sang house arrest.
Paathaag ni PNP spokesperson Col. Jean Fajardo nga ang DOJ ang nagpasaka sang kaso samtang sa PNP, ang Criminal Investigation and Detection Group (CIDG) ang nagserbe sang warrant of arrest batuk kanday Quiboloy.
Matandaan nga sang Marso 4, sa sini nga tuig, ginmandu ni Justice Sec. Jesus Crispin Remulla ang pag-file sang child abuse kag human trafficking cases batuk kay Quiboloy kag 5 pa sa mga associates sini.
Kaangut sini, maga-meeting ang PNP kag DOJ subong nga Martes agud paga-istoryahan ang masunod nga tikang.
Una diri, ginpahayag ni KOJC legal counsel Atty. Israelito Torreon sang tinalikdan nga Lunes nga maga-file sila sang petisyon agud hinyuon nga ibalhin si Quiboloy sa idalom sa kustodiya sang AFP ukon sa house arrest bangud suno diri 74-anyos na ang pastor nga may health condition.
Apang, sa bahin sang Department of National Defense nga may hurisdiskiyon sa AFP, hugot nga ginapanginwala sang mga ini ang anuman nga pagtangka nga ibalhin si Quiboloy sa military custody bangud indi ini ang nagakaigo nga ahensiya nga magkustodiya sa mga suspek sa criminal cases.
